Монгол Улсын Засгийн газар, Батлан хамгаалах яаманд Монгол Улсын Үндсэн хуулийн 17 дугаар зүйлд “Монгол Улсын иргэн эх орноо хамгаалах үүрэгтэй” гэж заасан байдаг. Энэ үүргийг биелүүлэх хэлбэр нь хугацаат цэргийн алба боловч, өнөөгийн байдлаар хугацаат цэргүүдийг цэргийн бус аж ахуйн ажилд өргөнөөр дайчилж байгаа нь тэдний үндсэн зорилго, бэлтгэлийн чанарыг алдагдуулж байна. Хугацаат цэрэг бол эх орныхоо батлан хамгаалах хүчний нэгж. Гэвч тэдгээр залуусыг хөдөө аж ахуй, барилга, засвар, бизнесийн чиглэлийн ажлуудад оролцуулж, зөрчилтэй нөхцөлд хөдөлмөр эрхлүүлэх явдал гарч байна. Энэ нь цэргүүдийн хөдөлмөрийн аюулгүй байдал, эрхийн баталгаанд сөргөөр нөлөөлөхөөс гадна цэргийн нэр хүндийг бууруулж байна. Бид дараах өөрчлөлтийг шаардаж байна: Хугацаат цэргийн албан хаагчдыг зөвхөн цэргийн болон мэргэжлийн сургалт, бэлтгэл, тактикийн дадлагад хамруулах; Цэргийн албыг дүүргэсэн иргэдэд иргэний мэргэжлийн сертификат олгох хөтөлбөрийг бий болгох; Аж ахуйн ажил, хувийн ашиг сонирхлын дагуу хөдөлмөр эрхлүүлэхийг хориглох хууль, дотоод журмыг батлах; Цэргийн албанд хүний эрхийн хяналт, ил тод байдлыг сайжруулах; Цэргүүдийн нийгмийн баталгааг нэмэгдүүлэх, сургалтын орчныг сайжруулах. Эдгээр арга хэмжээ нь: Цэргийн албаны нэр хүндийг хамгаалах, Хүний эрх, хөдөлмөрийн аюулгүй байдлыг хангах, Батлан хамгаалах хүчний чадварыг бодитоор нэмэгдүүлэх, Иргэдийн итгэлийг сэргээж, цэргийн албанд татагдах сонирхлыг нэмэгдүүлэх ач холбогдолтой юм. Хугацаат цэргийн алба нь залуусыг эх оронч, хариуцлагатай иргэн болгон төлөвшүүлэх сургууль байх ёстой. Харин аж ахуйн ажилд оролцуулах нь энэ зорилгыг үгүй хийж, албаны утгыг алдагдуулж байна. Иймд бид төр засгийг энэхүү асуудлыг бодлогын түвшинд авч үзэн хугацаат албан хаагчдыг мэргэжлийн сургалт, батлан хамгаалахын бодит дадлагад хамруулах шийдвэр гаргахыг хүсэж байна.