МОНГОЛ УЛСЫН ИХ ХУРАЛД Иргэн Баянжаргал овогтой Цогтгэрэл миний бие сум, дүүргийн иргэдийн Төлөөлөгчдийн Хурлын сонгуульд Улс төрийн нам нэр дэвшүүлж оролцохыг хориглож, шаардлага хангасан иргэн нэрээ өөрөө дэвшүүлж оролцдог байхаар хуульчлах асуудлаар иргэдийн нийтийн өргөдөл санаачилж байна. Монгол Улсын Үндсэн хуулийн 59 дүгээр зүйлийн 59.2-т "Нутгийн өөрөө удирдах байгууллага нь аймаг нийслэл, сум, дүүрэгт тухай нутаг дэвсгэрийн иргэдийн Төлөөлөгчдийн Хурал, баг хороонд иргэдийн Нийтийн хурал байна" гэж заасан хэдий ч есөн удаагийн орон нутгийн сонгуульд улс төрийн нам нэр дэвшүүлж оролцсоны улмаас орон даяар намчирхал, талцал газар авч, иргэд ахуй амьдралаа умартан намын үйл ажиллагаа, нөлөөлөлд хамрагдах болж, ялангуяа сум, дүүргийн хөгжил царцанги байдалд орж, уламжлалт ахуй, соёл гээгдэх хэмжээнд хүрээд байна. Иргэдийн Хурлуудыг намын хурал болгосноор орон нутгийн хөгжлийн бодлого залгамж чанараа бүрэн гээж, боловсон хүчний тогтвор суурьшил алдагдаж, сум, дүүргийн хөгжил зогсонги байдалд орж, иргэд төв суурин газар бараадах зэрэг сөрөг үр дагавар ихээр гарч байна. Сум дүүргийн иргэдийн Төлөөлөгчдийн Хурлын сонгуульд улс төрийн нам нэр дэвшүүлэхийг хориглож, иргэн нэрээ дэвшүүлж оролцдог болсноор иргэдийн сонгуулийн эрх чөлөө хангагдаж, иргэд цул болон төр засгаа хянах бололцоо нэмэгдэж, авлига, хулгай эрх багасах, намчирхал талцалаас үүдэлтэй халаа сэлгээ багасч боловсон хүчин тогтвор суурьшилтай ажиллаж, хөгжлийн бодлого тогтвортой хадгалагдах, орон нутгийн сонгуулийн зардал эрс багасч, улс төрийн намуудын санхүүгийн хэрэгцээ буурах юм. Иргэд ахуй амьдралдаа илүүтэй анхаарч өрхийн бизнес ургийн бизнес болон хөгжиж, ардчилсан нийгмийн бат тулгуур болсон салбарын мэргэжлийн холбоод, иргэний нийгмийн байгууллагууд хөгжих хөрс суурь бүрдэнэ. Иймд дээрх хуулийг Монгол Улсын Их Хурлаар хэлэлцүүлэн баталж өгөхийг хүсье.