Монгол Улсын Үндсэн хуулиар тунхагласан тусгаар тогтнол, үндэсний аюулгүй байдлын баталгааг бэхжүүлэх, төрийн дээд түвшинд шийдвэр гаргагчдын хариуцлагыг олон улсын жишигт нийцүүлэн шинэчлэх нь цаг үеийн зайлшгүй шаардлага болоод байна.Монгол Улсын тусгаар тогтнолын баталгаа нь зөвхөн хил хязгаар биш, төр засаг нь гадны ямар нэгэн нөлөө, ашиг сонирхлоос ангид байж, зөвхөн өөрийн ард түмний язгуур эрх ашгийн төлөө шийдвэр гаргахад оршдог. Гэвч геополитикийн ээдрээтэй нөхцөл байдал, эдийн засгийн лобби бүлэглэлүүдийн нөлөө нэмэгдэж буй энэ үед төрийн өндөр албан тушаалтнууд гадны агент, улс орны талд үйлчлэх эрсдэл бодитой оршиж байна.Өргөдлийн гол үндэслэлүүд: 1. Хариуцлагын дээд хэмжээ ба Насаар нь хязгаарлах зарчим: Одоогийн мөрдөгдөж буй хууль тогтоомжид төрийн албан тушаалтан гэмт хэрэг үйлдсэн тохиолдолд тодорхой хугацаагаар эрх хасах зохицуулалт байдаг.Гэвч "Эх орноосоо урвах" болон "Гадны ашиг сонирхлын төлөө ажиллах" нь төрт ёсонд учруулж буй хамгийн том хор хохирол юм. Ийм төрлийн гэмт хэрэгт холбогдсон этгээд дахин төрийн шийдвэр гаргах түвшинд ирэх нь үндэсний аюулгүй байдлын дархлааг сулруулна. Тиймээс улс төрийн эрхийг насаар нь хасах зохицуулалт нь төрийн албыг цэвэрлэх (Lustration) хамгийн хүчтэй механизм болно.2. Далд ажиллагааг илрүүлэх хяналтын тогтолцоо: Гадны нөлөөлөл нь ихэвчлэн шууд бус, санхүүгийн болон бусад давуу байдлаар дамжин "далд" хэлбэрээр хэрэгждэг. Төрийн өндөр албан тушаалтан, тэдний хамаарал бүхий этгээдүүдийн гадаад дахь санхүүгийн урсгал, хөрөнгө оруулалтад тусгайлсан хяналт тавих нь нууц хэлцлийг илрүүлэх гол түлхүүр юм. Иймээс зөвхөн баримтад тулгуурлаад зогсохгүй, урьдчилан сэргийлэх аудитын тогтолцоог хуульчлах шаардлагатай.3. Хуулийн өршөөлгүй бодлого: Төрийн нууц, тусгаар тогтнолтой холбоотой гэмт хэргүүдийг Өршөөлийн тухай хууль болон Ерөнхийлөгчийн уучлалд хамруулдаггүй байх нь хуулийн хатуу чанга, шударга байдлыг хангах үндэс болно. Энэ нь төрд зүтгэж буй хэн бүхэнд "Эх орноосоо урвавал эргэж ирэх замгүй" гэсэн хатуу сануулга болох юм.4. Олон улсын туршлага: Дэлхийн олон улс оронд гадаадын төлөөлөгчийн үйл ажиллагааг бүртгэх, лоббид хяналт тавих (FARA) болон үндэсний эрх ашгийн эсрэг ажилласан этгээдийг төрийн албанаас бүрмөсөн зайлуулах хуулиуд амжилттай хэрэгждэг. Бид энэ жишгээр дотоод дархлаагаа бэхжүүлэх цаг болсон.Бид юуг хүлээж байна вэ? Энэхүү өргөдлийг дэмжсэнээр Улсын Их Хурал холбогдох хуулиудад (Эрүүгийн хууль, Төрийн албаны тухай хууль, Сонгуулийн тухай хууль г.м) өөрчлөлт оруулж, төрийн зүтгэлтнүүдийн ёс зүй, хариуцлагыг шинэ түвшинд гаргана гэж итгэж байна.Төрийн өндөр албан тушаал хашиж буй хүн зөвхөн Монгол Улсын иргэдийн өмнө хариуцлага хүлээх ёстой. Гадны нөлөөнөөс ангид, цэвэр төр нь манай улсын хөгжлийн баталгаа юм. Эх орноо хайрлах иргэн бүрийг энэхүү санаачилгыг дэмжиж, гарын үсгээ зурахыг уриалж байна!