НИЙТИЙН ӨРГӨДӨЛ 1. Өргөдөл санаачлагчид Монгол Улсын иргэд бид зээлийн мэдээллийн сангийн “хар жагсаалт”-д бүртгэгдсэн иргэдэд 5 жилийн хугацаанд санхүүгийн үйлчилгээ авах боломжийг хязгаарладаг өнөөгийн зохицуулалтыг иргэдийн эрх ашиг, эдийн засгийн боломжид нийцүүлэн өөрчлөх шаардлагатай гэж үзэж энэхүү нийтийн өргөдлийг санаачилж байна. 2. Өргөдлийн агуулга Одоогийн мөрдөгдөж буй зохицуулалтын дагуу зээлийн эргэн төлөлтөд доголдол гаргасан иргэдийн мэдээлэл зээлийн мэдээллийн санд олон жилийн хугацаанд хадгалагдаж, зээлээ бүрэн төлж барагдуулсан ч дахин зээл авах, бизнес эхлүүлэх, орон сууцны болон хэрэглээний зээлд хамрагдах боломж нь удаан хугацаагаар хязгаарлагдаж байна. Ийм зохицуулалт алдаагаа засаж, өр төлбөрөө барагдуулсан иргэдэд дахин санхүүгийн боломж олгохгүй байгаа бөгөөд жижиг, дунд бизнес эрхлэгчид, залуу гэр бүл, санхүүгийн хүндрэлээс гарч буй иргэдэд сөргөөр нөлөөлж байна. 3. Гаргуулахыг хүссэн шийдвэр Монгол Улсын Их Хурал болон холбогдох төрийн байгууллагуудаас дараах асуудлыг судалж, шийдвэрлэхийг хүсье. * Зээлийн мэдээллийн “хар жагсаалт”-д бүртгэгдэх хугацаа болон 5 жилийн хязгаарлалтыг дахин хянаж, богиносгох. * Иргэн өр төлбөрөө бүрэн барагдуулсан тохиолдолд зээлийн сөрөг мэдээллийг тодорхой хугацааны дараа автоматаар шинэчилж, эсвэл устгах эрх зүйн зохицуулалт бий болгох. * Зээлийн түүхийг зөвхөн сөрөг мэдээллээр бус, төлбөрөө хугацаанд нь төлсөн эерэг мэдээлэлтэй нь хамтатган шударгаар үнэлдэг тогтолцоог бүрдүүлэх. Энэхүү өөрчлөлт нь иргэдийн санхүүгийн боломжийг нэмэгдүүлэх, бизнес эрхлэлтийг дэмжих, эдийн засгийн идэвхийг сайжруулахад чухал ач холбогдолтой гэж үзэж байна.