Монгол Улсын хүүхдийн эрх, хүүхэд хамгааллын бодлогыг боловсронгуй болгох, ерөнхий боловсролын сургууль болон хүүхэд оролцдог орчинд үйлдэгдэж буй дээрэлхэлт, дарамт, хүчирхийллийг бууруулах, хүүхдийн аюулгүй байдлыг хангах зорилгоор дараах саналыг гаргаж байна. Сургууль, боловсролын орчинд хүүхэд үе тэнгийнхнийхээ зүгээс бие махбодын болон сэтгэл санааны дарамт, дээрэлхэлт, хүчирхийлэлд өртөхөөс урьдчилан сэргийлэх, ийм үйлдэл гарсан тохиолдолд шуурхай арга хэмжээ авах, хариуцлагын тогтолцоог боловсронгуй болгох шаардлагатай гэж үзэж байна. Иймд хүүхдийн эсрэг санаатай, ноцтой хүчирхийллийн гэмт хэрэг үйлдсэн нь шүүхийн хүчин төгөлдөр шийдвэрээр тогтоогдсон этгээдэд насанд хүрсний дараа төрийн тодорхой албан тушаалд томилогдох, хүүхэдтэй ажиллах болон төрөөс олгох тодорхой төрлийн зээл, санхүүгийн дэмжлэг авахтай холбоотой тусгай шаардлага, хязгаарлалт тогтоох эрх зүйн зохицуулалтыг бий болгохыг санал болгож байна. Уг зохицуулалтыг зөвхөн хуульд тодорхой заасан, шүүхийн хүчин төгөлдөр шийдвэрээр тогтоогдсон ноцтой хүчирхийллийн гэмт хэрэгт хамааруулж, гэмт хэргийн шинж, учирсан хохирол, давтан үйлдэл, тухайн этгээдийн нас болон засрал хүмүүжлийн нөхцөл байдлыг харгалзан ялгамжтай хэрэглэх нь зүйтэй гэж үзэж байна. Мөн ерөнхий боловсролын сургуулиудад хүүхдийн дээрэлхэлт, хүчирхийллийг илрүүлэх, мэдээлэх, таслан зогсоох, хохирогч хүүхдэд сэтгэл зүй, нийгмийн болон эрх зүйн туслалцаа үзүүлэх тогтолцоог боловсронгуй болгох шаардлагатай байна. Иймд дээрх асуудлыг судлан үзэж, шаардлагатай хууль тогтоомжид нэмэлт, өөрчлөлт оруулах болон холбогдох шинэ зохицуулалтыг бий болгох замаар хүүхдийн эсрэг хүчирхийлэл, сургуулийн дээрэлхэлтийг бууруулах, хүүхдийн аюулгүй байдлыг хангах эрх зүйн орчныг бүрдүүлж өгөхийг хүсье.