Монгол Улсын Үндсэн хуульд иргэн бүр шууд болон төлөөлөгчдийн байгууллагаараа уламжлан төр барихад оролцох, сонгох эрхтэй гэж заасан. Гэтэл Монгол Улсын Их Хурлын сонгуулийн тухай хуулийн 65 дугаар зүйлийн 65.5 дахь хэсэгт "Сонгогч өөрийн байнга оршин суугаа газрынхаа харьяа хэсэгт санал өгнө" гэж заасан нь сурч хөдөлмөрлөх, чөлөөтэй шилжин суурьших болон бусад хүндэтгэх шалтгаанаар байнга оршин суугаа хаягнаасаа өөр газарт байгаа иргэдийн сонгох эрхийг бодитоор хязгаарлаж байна. Сонгуулийн өдөр томилолтоор ажиллаж байгаа, өөр аймаг, дүүрэгт суралцаж буй оюутнууд, түр оршин сууж буй иргэд болон зам, барилга, уул уурхай, аялал жуулчлалын салбарт ээлжийн ба хээрийн нөхцөлд ажиллаж байгаа олон мянган иргэд заавал харьяа хэсэг дээрээ очиж санал өгөх шаардлагатай болдог. Энэ нь иргэдэд санхүүгийн болон цаг хугацааны хүндрэл учруулж, улмаар сонгуулийн ирц, залуучуудын оролцоо буурахад голлон нөлөөлж байна. Технологийн ба системчилсэн боломж: Өнөөдөр Монгол Улсад төрийн цахим үйлчилгээний нэгдсэн систем "E-Mongolia" амжилттай нэвтэрч, иргэний бүртгэл болон шилжилт хөдөлгөөний мэдээлэл бодит цагийн (real-time) горимд шилжсэн. Сонгуулийн хэсгийн хороодыг нэгдсэн сүлжээнд холбож, дижитал бүртгэлийн шийдлийг ашигласнаар: Сонгогч сонгуулийн өдөр Монгол Улсын нутаг дэвсгэрт хаана байгаагаас үл хамааран, өөрт ойр байрлах аль ч хэсгийн хороонд биечлэн очиж санал өгөх; Нэгдсэн цахим системээр иргэний бүртгэлийг шалгаж, давхар санал өгөх эрсдэлийг бүрэн хааж баталгаажуулах боломжтой юм. Санал / Шаардлага: Иймд Монгол Улсын Их Хурлын сонгуулийн тухай хуулийн 65 дугаар зүйлийн 65.5 дахь хэсгийг өөрчлөх, иргэн сонгуулийн өдөр өөрийн байгаа газрынхаа харьяа хэсгийн хороонд биечлэн очиж саналаа өгөх эрх зүйн ба цахим бүртгэлийн орчныг бүрдүүлэх хуулийн төслийг санаачлан хэлэлцэж, баталж өгнө үү.