Хүний эрх, эрх чөлөөг гэмт халдлагаас хамгаалах, нийгмийн дэг журмыг хангах, олон нийтийн аюулгүй байдлыг сахин хамгаалах чиг үүргийг хэрэгжүүлдэг Цагдаа, Шүүхийн шийдвэр, Шүүхийн шинжилгээ, Хил хамгаалах, Онцгой байдал зэрэг байгууллагуудын хуулиар алба хаагчдын эрх зүйн байдал, шагнал урамшуулал, сахилгын шийтгэл оногдуулах журам зэргийг зохицуулдаг хууль зүйн практик тогтсон. Гэвч амьдрал дээр эдгээр эрх зүйн байдал өөр өөрөөр тогтсон, ялгамжтай хоорондоо зөрүүтэй, байгуулага болгон амбиц лоббинд хөтлөгдөж өөр байгууллагыхаас давуулан тогтоолгож өрсөлдөх маягтай болж ирсэн, урамшуулал, сахилгын шийтгэлийг ч нэгдсэн журмаар оногдуулахгүй зэрэг Үндсэн хуулийн ажил мэргэжлээр нь ялгварлан гадуурхахгүй байх зарчимтай зөрчилдөж байна. Тиймээс нэгдсэн нэгдмэл байдлаар зохицуулсан Хууль сахиулах албаны тухай хууль батлах шаардлага, хэрэгцээ байна.