Ковид-19 цар тахлын улмаас 2020-2023 оны хооронд нийгмийн даатгалын шимтгэлээ төлж чадаагүй иргэдийг нэг удаа нөхөн төлөх боломжийг олгох шаардлага байна. Дээрх хугацаанд бизнесийн орчин илт муудаж, олон аж ахуйн нэгжүүд хаалгаа барьсан, төрөөс үйл ажиллагааг нь хязгаарласан, хориглосон, хатуу хөл хорио тогтоосон зэргээс иргэдийн орлого тасалдаж, хувиараа нийгмийн даатгалын шимтгэлээ сайн дураар төлөх санхүүгийн боломжгүй байдал үүссэн. Иймд тэдгээр иргэдийн ажилласан жилээ тооцуулж, шимтгэлээ тухайн үеийн хөдөлмөрийн хөлсний доод хэмжээгээр тооцож нөхөн төлөх боломжийг хуулиар нэг удаа олгох, нөгөө талаас нийгмийн даатгалын сангийн орлогыг нэмэгдүүлэх ач холбогдолтой байна. Иймд 2020-2023 оныг хүртэл хугацаанд иргэдийн нийгмийн даатгалын шимтгэлээ сайн дураар нөхөн төлөх боломжийг нэг удаа олгох үүднээс хууль санаачлах өргөдөл гаргав.