Монгол Улсын Их Хурал болон Монгол Улсын Засгийн газарт хандан Шүгэл үлээгчийг хамгаалах тухай хуулийн төслийг яаралтай Улсын Их Хуралд өргөн мэдүүлж, хэлэлцэн шийдвэрлэх бодит арга хэмжээ авахыг шаардаж байна. Шүгэл үлээгчид нь авлига, ашиг сонирхлын зөрчил, төсвийн хөрөнгийн үр ашиггүй зарцуулалт, хүний эрхийн зөрчил, байгаль орчны эсрэг хууль бус үйл ажиллагаа зэрэг нийтийн эрх ашигт хохирол учруулж болзошгүй асуудлыг илрүүлэхэд онцгой үүрэг гүйцэтгэдэг. Гэвч өнөөдөр ийм мэдээлэл өгсөн иргэд ажлаасаа халагдах, дарамт шахалтад өртөх, ялгаварлан гадуурхагдах, нэр төр болон аюулгүй байдлаараа хохирох эрсдэлтэй хэвээр байна. Монгол Улс Нэгдсэн Үндэстний Байгууллагын Авлигын эсрэг конвенцод нэгдэн орсон бөгөөд нийтийн ашиг сонирхлын төлөө мэдээлэл өгсөн хүмүүсийг хамгаалах эрх зүйн орчныг бүрдүүлэх үүрэг хүлээсэн. Шүгэл үлээгчийг хамгаалах тухай хуулийн төслийг боловсруулах ажил олон жилийн өмнөөс эхэлж, Засгийн газар 2026 оны 3 дугаар сард уг хуулийн төслийг дэмжин Улсын Их Хуралд өргөн мэдүүлэхээр шийдвэрлэсэн. Гэвч өнөөдрийг хүртэл уг асуудал бүрэн шийдвэрлэгдээгүй байгаа нь авлигатай тэмцэх, шударга ёсыг бэхжүүлэх бодит алхам удааширч байгааг харуулж байна. Авлигатай тэмцэх тухай улс төрийн амлалт хангалтгүй. Авлига, хууль бус үйлдлийг илчилсэн иргэдийг хамгаалж чаддаг эрх зүйн тогтолцоо л бодит үр дүн авчирна. Иймд: • Шүгэл үлээгчийг хамгаалах тухай хуулийн төслийн явц, төлөвлөгөөг олон нийтэд ил тод мэдээлэх; • Хуулийн төслийг яаралтай Улсын Их Хуралд өргөн мэдүүлэх; • Хуулийн төслийг иргэний нийгэм, мэргэжлийн байгууллага, иргэдийн оролцоотойгоор нээлттэй хэлэлцүүлэх; • Шүгэл үлээгчдийн нууцлал, аюулгүй байдал, хөдөлмөр эрхлэлт болон эрх ашгийг хамгаалах үр нөлөөтэй баталгааг хуульд тусгах; • Монгол Улсын олон улсын өмнө хүлээсэн үүргийг хэрэгжүүлэх; арга хэмжээг нэн даруй авч хэрэгжүүлэхийг шаардаж байна. Үнэнийг мэдээлсэн иргэдээ хамгаалж чаддаггүй улс авлигатай үр дүнтэй тэмцэж чаддаггүй. Харин шүгэл үлээгчээ хамгаалдаг улс шударга ёс, ил тод байдал, хариуцлагатай засаглалыг бэхжүүлдэг. Иймд энэхүү өргөдлийг дэмжиж, Монгол Улсад шүгэл үлээгчийг хамгаалах эрх зүйн орчныг бүрдүүлэх үйл хэрэгт нэгдэхийг нийт иргэддээ уриалж байна.