Монгол Улсын Засгийн газар, холбогдох яам, агентлаг, нийслэл болон орон нутгийн Огноо: 2026 оны 09 сарын 10 өдөр Цэцэрлэг, сургуулийн хүүхдийн үдийн цай, хоолны чанар, шим тэжээл, үйлчилгээнд шинэчлэл хийх тухай Монгол Улсын ирээдүй болсон хүүхэд багачуудын эрүүл мэнд, өсөлт хөгжил, суралцах чадварт өдөр тутмын зөв, чанартай, шим тэжээллэг хоол хүнс онцгой ач холбогдолтой билээ. Гэвч цэцэрлэг, ерөнхий боловсролын сургуулийн хүүхдийн хоол, үдийн цайны үйлчилгээний чанар, илчлэг болон шим тэжээлийн агууламж, хоолны нэр төрөл, бүтээгдэхүүний чанар, ариун цэвэр, хүүхдийн насны онцлогт тохирсон байдал зэрэгт цаашид анхаарч, бодит шинэчлэл хийх шаардлагатай гэж үзэж байна. Иймд дараах асуудлыг улсын хэмжээнд нэгдсэн бодлого, стандартын хүрээнд шинэчлэн сайжруулж өгөхийг хүсэж байна. Үүнд: 1. Цэцэрлэг, сургуулийн хүүхдийн хоолны чанар, шим тэжээлийн стандартыг шинэчлэн сайжруулах; 2. Хүүхдийн нас, өсөлт хөгжилд тохирсон уураг, амин дэм, эрдэс бодис болон бусад шаардлагатай шим тэжээлийг хангахуйц цэс боловсруулж, улирлын онцлогт тохируулан тогтмол шинэчилдэг болох; 3. Хүүхдэд өгч буй хоолны мах, сүү, сүүн бүтээгдэхүүн, хүнсний ногоо, жимс болон бусад бүтээгдэхүүний чанар, гарал үүсэлд тавих хяналтыг нэмэгдүүлэх; 4. Хэт их сахар, давс, боловсруулсан бүтээгдэхүүний хэрэглээг бууруулж, эрүүл, тэжээллэг хүнсээр хангах; 5. Хоол үйлдвэрлэлийн гал тогоо, тоног төхөөрөмж, хадгалалт, тээвэрлэлт, ариун цэвэр, ажилтнуудын эрүүл ахуйн нөхцөлд тогтмол, хараат бус хяналт шалгалт хийдэг болох; 6. Хүүхдэд олгож буй хоолны цэс, орц найрлага, илчлэг, хүнсний бүтээгдэхүүний гарал үүслийн мэдээллийг эцэг эхэд нээлттэй, ил тод хүргэдэг болох; 7. Хүүхдийн хоолны төсөв, нэг хүүхдэд ногдох зардлыг бодит хүнсний үнэ, хүүхдийн эрүүл өсөлт хөгжилд шаардлагатай шим тэжээлтэй уялдуулан дахин тооцож, шаардлагатай хэмжээнд нэмэгдүүлэх; 8. Эцэг эх, багш, хоол зүйч, эмч, хүүхдийн хоол тэжээлийн мэргэжилтнүүдийн оролцоотойгоор хүүхдийн хоолны чанарт үнэлгээ өгөх тогтолцоо бий болгох; 9. Хүүхдийн хоол хүнсний асуудлаар гарч буй санал, гомдлыг хүлээн авч, шийдвэрлэдэг нэгдсэн, шуурхай хяналтын механизм бий болгох; 10. Эдгээр шинэчлэлийг зөвхөн нэг байгууллага, нэг цэцэрлэг, нэг сургуулийн хүрээнд бус улсын хэмжээнд нэгдсэн байдлаар хэрэгжүүлэх. Хүүхэд бүр хаана амьдарч байгаагаас үл хамааран эрүүл, аюулгүй, чанартай, шим тэжээллэг хоол хүнсээр адил тэгш хангагдах эрхтэй гэж үзэж байна. Иймд дээр дурдсан асуудлыг холбогдох байгууллагууд анхааралдаа авч, цэцэрлэг, сургуулийн хүүхдийн хоол үйлдвэрлэл, үйлчилгээний тогтолцоонд бодитой шинэчлэл хийж, улсын хэмжээнд хэрэгжүүлэх арга хэмжээ авахыг хүсье. Мөн уг асуудлаар авч хэрэгжүүлэх арга хэмжээ, шийдвэрийн талаар иргэд, эцэг эхчүүдэд ил тод мэдээлэл өгөхийг хүсэж байна. Хүндэтгэсэн Өргөдөл гаргасан: Гантулга овогтой Мягмарзул Утас: 95011951