Монгол Улсын Их Хурлын гишүүд, холбогдох байнгын хороо болон шийдвэр гаргах эрх бүхий байгууллагад Иргэдийн өмчлөлд байгаа авто зогсоол (гараж, зогсоолын талбай)-д ногдуулж буй үл хөдлөх хөрөнгийн татварын одоогийн зохицуулалт нь бодит эдийн засгийн ашиглалт, нийгмийн нөхцөл байдалтай уялдаа муутай, давхар ачаалал үүсгэж байна. Олон иргэн авто зогсоолыг нэг удаа өндөр үнэ төлөн худалдан авч, өдөр тутмын хэрэгцээндээ ашигладаг. Энэ нь зөвхөн хувийн хэрэглээний асуудал бус бөгөөд хотын төвийн болон орон сууцны бүсийн гадна талбайн үнэгүй зогсоолын ачааллыг бууруулж, замын хөдөлгөөний эмх цэгц, хүртээмжийг сайжруулахад шууд бус байдлаар эерэг нөлөө үзүүлдэг. Гэтэл одоогийн татварын тогтолцоогоор: - Иргэн нэгэнт өндөр үнэ төлж худалдан авсан хөрөнгөн дээр дахин жил бүр татвар төлөх шаардлагатай болж байна - Нийтийн зогсоолын ачааллыг бууруулж буй эерэг нөлөөг татварын бодлогод харгалзан үзэхгүй байна - Кадастрын үнэлгээ, бодит ашиглалтын ялгааг хангалттай тусгаагүй байна - Өмчлөх эрхийн эдийн засгийн ачааллыг давхардуулж байна Ийм нөхцөл нь шударга татварын зарчим болон иргэдийн эдийн засгийн бодит байдалтай нийцэхгүй гэж үзэж байна. Иймд Монгол Улсын Их Хурал дараах чиглэлээр арга хэмжээ авч өгнө үү: - Авто зогсоолын үл хөдлөх хөрөнгийн татварын суурь үнэлгээ, тооцооллын аргачлалыг дахин хянах - Иргэдийн нэг удаагийн өндөр өртгөөр худалдан авсан болон зөвхөн өөрийн хэрэгцээнд ашиглаж буй зогсоолд ногдуулж буй татварын дарамтыг бууруулах эрх зүйн орчныг бүрдүүлэх - Авто зогсоолын ашиглалтын нийгмийн ач холбогдлыг харгалзан татварын бодлогыг шинэчлэх - Шаардлагатай тохиолдолд авто зогсоолын татварыг бууруулах эсхүл цуцлах хууль тогтоомжийн өөрчлөлтийг хэлэлцэн шийдвэрлэх Энэхүү асуудал нь олон иргэний өдөр тутмын амьдрал, өмчлөх эрхийн эдийн засгийн баталгаанд шууд нөлөөлж байгаа тул өргөн хүрээнд авч үзэн шийдвэрлэх шаардлагатай гэж үзэж байна.