Монгол Улсын Үндсэн хуульд заасан "Хууль өмнө бүгд тэгш байх", "Шударга ёс"-ны зарчмыг бодит амьдрал дээр хэрэгжүүлэхэд авлига, албан тушаалын гэмт хэргийн "далд" хэлбэрүүд хамгийн том саад болж байна. Одоогийн мөрдөгдөж буй хууль тогтоомжид зарим үйлдлийг нарийвчлан заагаагүйгээс үүдэж, гэмт этгээдүүд хуулийн цоорхой ашиглан ял завшиж байна. Иймд дараах гурван үндсэн чиглэлээр Эрүүгийн хууль болон Авлигын эсрэг хуульд нэмэлт, өөрчлөлт оруулахыг санаачилж байна.Нэгдүгээрт: Хамаарал бүхий этгээдээр дамжуулан мөнгө угаах асуудлыг цогцоор нь шийдэх. Албан тушаалтан өөрийн гэр бүл, төрөл садан төдийгүй найз нөхөд, бизнесийн хамтрагч зэрэг "нуугдмал хамаарал"-тай этгээдийн нэр дээр компани байгуулж, түүгээрээ дамжуулан мөнгө угаах, тендер авах үйлдлийг тусгайлан зааж, 5-аас доошгүй жил хорих ял оногдуулдаг болох. Мөн гэмт хэргийн замаар олсон хөрөнгийг бүрэн хурааж, тухайн компанийг төрийн худалдан авалтад оролцох эрхийг бүх насаар нь хасах шаардлагатай.Хоёрдугаарт: Хууль хяналтын байгууллагын ажилтнуудын "далд тохиролцоо"-г хаах. Хэрэг бүртгэлт, мөрдөн байцаалт, шүүх, прокурорын шатанд хэргийг шалгаж буй этгээд холбогдогчтой далд байдлаар мөнгө авах, эсвэл ирээдүйд өндөр албан тушаалд томилогдохоор тохиролцсон бол үүнийг авлигын хамгийн хүнд хэлбэрт тооцож, 20 хүртэлх жилийн хорих ял оногдуулдаг болох. Энэхүү амлалт, тохиролцоо нь биет байдлаар хэрэгжсэн эсэхээс үл хамааран "тохиролцсон" баримт нотлогдсон тохиолдолд ял оноодог болох нь төрийн албаны цэвэр байдлыг хангахад чухал үүрэгтэй.Гуравдугаарт: Иргэдийн хяналтыг дэмжиж, нотлох баримтын үнэлэмжийг нэмэгдүүлэх. Далд тохиролцоог илрүүлэхэд иргэдээс ирүүлсэн аудио, видео бичлэг болон бусад цахим баримтыг шүүх нотлох баримтын хэмжээнд шууд үнэлдэг болох заалтыг оруулах хэрэгтэй. Эдгээр өөрчлөлтүүд нь авлигачдад "эрсдэл нь ашгаасаа их" байх дохиог өгч, хуулийн байгууллагад итгэх иргэдийн итгэлийг сэргээх болно. Нийт иргэд та бүхнийг энэхүү шударга ёсны төлөөх өргөдлийг дэмжихийг уриалж байна.