Монгол Улсад жүжигчин, дуучин, хөтлөгч, тамирчин, инфлюэнсер зэрэг олон нийтийн нөлөө бүхий хүмүүсийг оролцуулсан кино, телевизийн бүтээл, сурталчилгаа, маркетингийн төсөлд их хэмжээний хөрөнгө оруулалт хийгддэг. Гэвч тухайн этгээдийн хууль зөрчсөн, эсхүл гэрээнд заасан ёс зүйн шаардлагыг ноцтой зөрчсөн үйлдлийн улмаас гэрээ цуцлагдах, бүтээл зах зээлээс татагдах, сурталчилгаа зогсох зэрэг нөхцөл үүсч, компани, продакшн болон хөрөнгө оруулагчид бодит санхүүгийн болон нэр хүндийн хохирол хүлээх тохиолдол гарч болзошгүй. Иймд сурталчилгаа, кино, урлаг, спортын салбарын гэрээнд ёс зүйн хариуцлагын (Morality Clause) заалтыг илүү тодорхой хэрэглэх эрх зүйн орчныг боловсронгуй болгож, гэрээ байгуулсан этгээдийн өөрийн буруутай үйлдлийн улмаас гэрээ цуцлагдаж, учирсан бодит хохирол нотлогдсон тохиолдолд гэрээний нөхцөлийн дагуу нөхөн төлбөр гаргуулах боломжийг хууль тогтоомжийн хүрээнд судалж, шаардлагатай бол холбогдох өөрчлөлтийг хийхийг санал болгож байна. Энэхүү санал нь хэн нэгний үзэл бодлоо илэрхийлэх эрх чөлөөг хязгаарлах зорилгогүй бөгөөд зөвхөн гэрээний талуудын эрх, үүрэг, хариуцлагыг тодорхой болгож, бизнесийн шударга харилцаа, хөрөнгө оруулалтын эрсдэлийг бууруулах, олон нийтийн өмнө хүлээх хариуцлагыг нэмэгдүүлэх зорилготой юм. Ийм зохицуулалт нь олон улсын жишигт нийцсэн гэрээний соёлыг төлөвшүүлэх, хөрөнгө оруулагчдын хууль ёсны эрх ашгийг хамгаалах, урлаг, спорт, сурталчилгааны салбарын тогтвортой хөгжлийг дэмжихэд эерэг нөлөө үзүүлнэ гэж үзэж байна.